طريق طويلة من استانبول للجنوب , للبحر الابيض, بتمر بجبال الامانوس , من تحت صفحة بيضة من الضباب ومن فوق غيوم التلج , منظر بيسحرك و بيوحيلك بماهية الجنة والخلود ..
أرض غريبة ,مو لحدا , بتشبه الشعر الاحمر, وبتشبه الايد الحمرا
مر التاريخ كلو من فوقا ..الطريق بيوصّل لمحل بيشبه الطفولة , بيشبه الماضي , بيختصر كل شي شفتو بحياتك ,,لغات كتيرة , تضاريس كتيرة , شعوب كتيرة , وديان , ينابيع , شلالات , عرق بلدي , وعرق سوري
المسا بيجي القمر بياخدك حد الجبل وبيجي البحر , بيجي ليعلا كل ليلة وما بيصل ...كرفانة بتبيع صندويش جنب الطريق بين البحر وبين الجبل , بتبيعك حكي بالسياسة وبتبيع سمك "هي أميركا , بلشت بالعراق , بعدين تونس , مصر , ليبيا , سوريا وايران , وبعدين بدا توصل لتركيا "بتطلّع بالبحر .. البحر هادي ,ما بيتأثر بحكي الصياد اللي بدو الهوا يقوى مشان يرمي الشبك , حاولت ما اسمع العلاك وشم شوية هوا جاية من الطرف التاني .. الطرف اللي الو حكاية تانية
ضو ابيض , جنبو فلاش عم يضوي كل شوي . من الارض طالع ؟ من السما نازل ؟ ما بيهم , بعدين بتعرف من حالك انو هنيك ما عاد فرقت كتير الارض عن السما ,, وين بدك تحط راسك هلاء لتنام !
سؤال تخطيتو ببيرايتين وشوية عرق ونمت بالسيارة .
ذو الفقار , أحمد كايا , يلماز غوني , الارمن , الاتراك , العرب , الاكراد , السريان , اليهود , العاصي , المتوسط , طوروس , شي برد , شي حر , هي هي أنطاكيا .. عاصمة سوريا الاولى .. هون الارض قديمة . بس هون الشعب لسا محتار ...
مين اللي رسم الحدود . مين اللي درّج اللغة ورماها بيناتنا .. كيف صرنا كلنا غربا هيك .. متل البنت اللي موعاجبا شالا الاحمر أو ما بتحب الشال أصلا .
أنا بعّدت ورجعت ع استانبول , وهيّ بقيت ,البنت اللي ما رضيت ترجع .
